פרק יב

1וְאֵ֙לֶּה֙ הַכֹּֽהֲנִ֣ים וְהַֽלְוִיִּ֔ם אֲשֶׁ֥ר עָל֛וּ עִם־זְרֻבָּבֶ֥ל בֶּן־שְׁאַלְתִּיאֵ֖ל וְיֵשׁ֑וּעַ שְׂרָיָ֥ה יִרְמְיָ֖ה עֶזְרָֽא:
וישוע: הוא יהושע הכהן הגדול:
2אֲמַרְיָ֥ה מַלּ֖וּךְ חַטּֽוּשׁ:
3שְׁכַנְיָ֥ה רְחֻ֖ם מְרֵמֹֽת:
4עִדּ֥וֹא גִנְּת֖וֹי אֲבִיָּֽה:
5מִיָּמִ֥ין מַֽעַדְיָ֖ה בִּלְגָּֽה:
6שְׁמַעְיָ֥ה וְיֽוֹיָרִ֖יב יְדַעְיָֽה:
7סַלּ֣וּ עָמ֔וֹק חִלְקִיָּ֖ה יְדַעְיָ֑ה אֵ֣לֶּה רָאשֵׁ֧י הַכֹּֽהֲנִ֛ים וַֽאֲחֵיהֶ֖ם בִּימֵ֥י יֵשֽׁוּעַ:
בימי ישוע: שהיו ראשים בימי יהושע כהן גדול:
8וְהַֽלְוִיִּ֗ם יֵשׁ֧וּעַ בִּנּ֛וּי קַדְמִיאֵ֥ל שֵֽׁרֵבְיָ֖ה יְהוּדָ֣ה מַתַּנְיָ֑ה עַל־הֻיְּד֖וֹת ה֥וּא וְאֶחָֽיו:
הידות: מן כלי שיר לומר שירה:
9וּבַקְבֻּקְיָ֨ה וְעֻנִּ֧י (כתיב וְעֻנִּ֧ו) אֲחֵיהֶ֛ם לְנֶגְדָּ֖ם לְמִשְׁמָרֽוֹת:
למשמרות: כמו שמצינו (בדברי הימים א' כ"ד ואילך) שהלוים היו חלוקים לעשרים וארבעה משמרות:
10וְיֵשׁ֖וּעַ הוֹלִ֣יד אֶת־יֽוֹיָקִ֑ים וְיֽוֹיָקִים֙ הוֹלִ֣יד אֶת־אֶלְיָשִׁ֔יב וְאֶלְיָשִׁ֖יב אֶת־יוֹיָדָֽע:
וישוע הוליד את יויקים וגו': כל אלו שבמקרא זה היו כהנים גדולים:
11וְיֽוֹיָדָע֙ הוֹלִ֣יד אֶת־יוֹנָתָ֔ן וְיוֹנָתָ֖ן הוֹלִ֥יד אֶת־יַדּֽוּעַ:
12וּבִימֵי֙ יֽוֹיָקִ֔ים הָי֥וּ כֹֽהֲנִ֖ים רָאשֵׁ֣י הָאָב֑וֹת לִשְׂרָיָ֣ה מְרָיָ֔ה לְיִרְמְיָ֖ה חֲנַנְיָֽה:
ובימי יויקים: שהיה כהן גדול היו כהנים הללו הם היו ראשים ראשי בית אב למשמרותם:
לשריה מריה: למשמרת של שריה היה מריה ראש בית אב ולמשמרת של ירמיה היה חנניה ראש בית אב וכן כולם ואת אשר לא פירש כל העשרי' וארבע משמרות לא דקדק המקרא בכך למנותם כולם:
13לְעֶזְרָ֣א מְשֻׁלָּ֔ם לַֽאֲמַרְיָ֖ה יְהֽוֹחָנָֽן:
14 לִמְלִ֙יכוּ֙ (כתיב לִמְלִ֙וכיּ֙) יֽוֹנָתָ֔ן לִשְׁבַנְיָ֖ה יוֹסֵֽף:
15לְחָרִ֣ם עַדְנָ֔א לִמְרָי֖וֹת חֶלְקָֽי:
16 לְעִדּ֥וֹא (כתיב לְעִדֹּ֥יא) זְכַרְיָ֖ה לְגִנְּת֥וֹן מְשֻׁלָּֽם:
17לַֽאֲבִיָּ֖ה זִכְרִ֑י לְמִ֨נְיָמִ֔ין לְמֽוֹעַדְיָ֖ה פִּלְטָֽי:
18לְבִלְגָּ֣ה שַׁמּ֔וּעַ לִשְׁמַעְיָ֖ה יְהוֹנָתָֽן:
19וּלְיֽוֹיָרִ֣יב מַתְּנַ֔י לִֽידַעְיָ֖ה עֻזִּֽי:
20לְסַלַּ֥י קַלַּ֖י לְעָמ֥וֹק עֵֽבֶר:
21לְחִלְקִיָּ֣ה חֲשַׁבְיָ֔ה לִֽידַעְיָ֖ה נְתַנְאֵֽל:
22הַֽלְוִיִּם֩ בִּימֵ֨י אֶלְיָשִׁ֜יב יֽוֹיָדָ֚ע וְיֽוֹחָנָן֙ וְיַדּ֔וּעַ כְּתוּבִ֖ים רָאשֵׁ֣י אָב֑וֹת וְהַכֹּ֣הֲנִ֔ים עַל־מַלְכ֖וּת דָּֽרְיָ֥וֶשׁ הַפַּֽרְסִֽי:
הלוים בימי אלישיב: הלוים הללו היו ראשי בית אבות במשמרות הלוים בימי אלישיב הכהן הגדול והכהנים המנוין למעלה בסמוך הם היו ראשי בית אבות במשמרותם גם בימי אלישיב:
על מלכות: בימי מלכות דריוש היה דבר זה:
23בְּנֵ֚י לֵוִי֙ רָאשֵׁ֣י הָֽאָב֔וֹת כְּתוּבִ֕ים עַל־סֵ֖פֶר דִּבְרֵ֣י הַיָּמִ֑ים וְעַד־יְמֵ֖י יֽוֹחָנָ֥ן בֶּן־אֶלְיָשִֽׁיב:
ועד ימי יוחנן: כל אותן שהיו ראשי אבות הלוים עד ימי יוחנן כהן גדול מנוין שם בדברי הימים:
24וְרָאשֵׁ֣י הַֽ֠לְוִיִּם חֲשַׁבְיָ֨ה שֵֽׁרֵבְיָ֜ה וְיֵשׁ֚וּעַ בֶּן־קַדְמִיאֵל֙ וַֽאֲחֵיהֶ֣ם לְנֶגְדָּ֔ם לְהַלֵּ֣ל לְהוֹד֔וֹת בְּמִצְוַ֖ת דָּוִ֣יד אִישׁ־הָֽאֱלֹהִ֑ים מִשְׁמָ֖ר לְעֻמַּ֥ת מִשְׁמָֽר:
משמר לעומת משמר: שהיו חלוקים במשמרותם לומר שירה:
25מַתַּנְיָ֧ה וּבַקְבֻּֽקְיָ֛ה עֹֽבַדְיָ֥ה מְשֻׁלָּ֖ם טַלְמ֣וֹן עַקּ֑וּב שֹֽׁמְרִ֚ים שֽׁוֹעֲרִים֙ מִשְׁמָ֔ר בַּֽאֲסֻפֵּ֖י הַשְּׁעָרִֽים:
שוערים משמר: שוערים היו במשמר שלהם לשמור שערי הבית:
באסופי: כמו בסיפי השערים:
26אֵ֕לֶּה בִּימֵ֛י יֽוֹיָקִ֥ים בֶּן־יֵשׁ֖וּעַ בֶּן־יֽוֹצָדָ֑ק וּבִימֵי֙ נְחֶמְיָ֣ה הַפֶּחָ֔ה וְעֶזְרָ֥א הַכֹּהֵ֖ן הַסּוֹפֵֽר:
אלה בימי יויקים: אלה היו שוערים בימי יויקים:
27וּבַֽחֲנֻכַּ֞ת חוֹמַ֣ת יְרֽוּשָׁלִַ֗ם בִּקְשׁ֚וּ אֶת־הַלְוִיִּם֙ מִכָּל־מְק֣וֹמֹתָ֔ם לַֽהֲבִיאָ֖ם לִירֽוּשָׁלִָ֑ם לַֽעֲשׂ֨ת חֲנֻכָּ֚ה וְשִׂמְחָה֙ וּבְתוֹד֣וֹת וּבְשִׁ֔יר מְצִלְתַּ֖יִם נְבָלִ֥ים וּבְכִנֹּרֽוֹת:
ובחנוכת חומת ירושלים: בתשלום חומת העיר לקדש את העיר:
ובתודות: ובהודאות:
28וַיֵּאָ֣סְפ֔וּ בְּנֵ֖י הַֽמְשֹֽׁרְרִ֑ים וּמִן־הַכִּכָּר֙ סְבִיב֣וֹת יְרֽוּשָׁלִַ֔ם וּמִן־חַצְרֵ֖י נְטֹֽפָתִֽי:
ומן הככר: אשר סביבות ירושלים באו המשוררים:
29וּמִבֵּית֙ הַגִּלְגָּ֔ל וּמִשְּׂד֥וֹת גֶּ֖בַע וְעַזְמָ֑וֶת כִּ֣י חֲצֵרִ֗ים בָּנ֚וּ לָהֶם֙ הַמְשֹׁ֣רְרִ֔ים סְבִיב֖וֹת יְרֽוּשָׁלִָֽם:
30וַיִּטַּֽהֲר֔וּ הַכֹּֽהֲנִ֖ים וְהַֽלְוִיִּ֑ם וַיְטַֽהֲרוּ֙ אֶת־הָעָ֔ם וְאֶת־הַשְּׁעָרִ֖ים וְאֶת־הַֽחוֹמָֽה:
ויטהרו: תחלה טהרו את עצמן ואח"כ טהרו את אחרים:
ואת השערים ואת החומה: שלא תהיה טומאה שם בעיר:
31וָאַֽעֲלֶה֙ אֶת־שָׂרֵ֣י יְהוּדָ֔ה מֵעַ֖ל לַחוֹמָ֑ה וָאַֽעֲמִ֡ידָה שְׁתֵּ֣י תוֹדֹת֩ גְּדוֹלֹ֨ת וְתַֽהֲלֻכֹ֚ת לַיָּמִין֙ מֵעַ֣ל לַחוֹמָ֔ה לְשַׁ֖עַר הָֽאַשְׁפֹּֽת:
מעל לחומה: שקדש את העיר והלכו השרים ובית דין והכהנים והלוים עם שתי תודות סביב לעיר הכל כמפורש במסכת שבועות כדי לקדש את העיר:
שתי תודות: שתי לחמי תודה כל לחם ולחם קרוי תודה:
ותהלוכות לימין: וכאשר יצאו מן העיר כדי לסובבה הלכו לצד ימינה:
32וַיֵּ֚לֶךְ אַֽחֲרֵיהֶם֙ הֽוֹשַׁעְיָ֔ה וַֽחֲצִ֖י שָׂרֵ֥י יְהוּדָֽה:
33וַֽעֲזַרְיָ֥ה עֶזְרָ֖א וּמְשֻׁלָּֽם:
34יְהוּדָה֙ וּבִנְיָמִ֔ן וּשְׁמַעְיָ֖ה וְיִרְמְיָֽה:
יהודה ובנימין: שני שרים היו:
35וּמִבְּנֵ֥י הַכֹּֽהֲנִ֖ים בַּֽחֲצֹֽצְר֑וֹת זְכַרְיָ֨ה בֶן־יֽוֹנָתָ֜ן בֶּן־שְׁמַעְיָ֚ה בֶן־מַתַּנְיָה֙ בֶּן־מִ֣יכָיָ֔ה בֶּן־זַכּ֖וּר בֶּן־אָסָֽף:
36וְאֶחָ֡יו שְׁמַעְיָ֡ה וַֽעֲזַרְאֵ֡ל מִֽלֲלַ֡י גִּֽלֲלַ֡י מָעַ֞י נְתַנְאֵ֚ל וִֽיהוּדָה֙ חֲנָ֔נִי בִּכְלֵי־שִׁ֥יר דָּוִ֖יד אִ֣ישׁ הָֽאֱלֹהִ֑ים וְעֶזְרָ֥א הַסּוֹפֵ֖ר לִפְנֵיהֶֽם:
ואחיו: חביריו של זכריה הכהן:
37וְעַל֩ שַׁ֨עַר הָעַ֜יִן וְנֶגְדָּ֗ם עָלוּ֙ עַֽל־מַֽעֲלוֹת֙ עִ֣יר דָּוִ֔יד בַּמַּֽעֲלֶ֖ה לַֽחוֹמָ֑ה מֵעַל֙ לְבֵ֣ית דָּוִ֔יד וְעַ֛ד שַׁ֥עַר הַמַּ֖יִם מִזְרָֽח:
ועל שער העין: לפני שער העין הלכו סביבות העיר:
ונגדם עלו: ולפניהם עלו משער העין למעלות של עיר דוד ואותן מעלות היו לחומה:
38וְהַתּוֹדָ֧ה הַשֵּׁנִ֛ית הַֽהוֹלֶ֥כֶת לְמ֖וֹל (כתיב לְמ֖וֹאל) וַֽאֲנִ֣י אַֽחֲרֶ֑יהָ וַֽחֲצִ֨י הָעָ֜ם מֵעַ֣ל לְהַחוֹמָ֗ה מֵעַל֙ לְמִגְדַּ֣ל הַתַּנּוּרִ֔ים וְעַ֖ד הַחוֹמָ֥ה הָרְחָבָֽה:
והתודה השנית ההולכת למול: תודה אחרת שהיתה שנית לחברתה היתה הולכת נגד חברתה בשוה ולא זו אחר זו:
ואני אחריה: ואני הייתי הולך אחריה של תודה:
39וּמֵעַ֣ל לְשַֽׁעַר־אֶ֠פְרַיִם וְעַל־שַׁ֨עַר הַיְשָׁנָ֜ה וְעַל־שַׁ֣עַר הַדָּגִ֗ים וּמִגְדַּ֚ל חֲנַנְאֵל֙ וּמִגְדַּ֣ל הַמֵּאָ֔ה וְעַ֖ד שַׁ֣עַר הַצֹּ֑אן וְעָ֣מְד֔וּ בְּשַׁ֖עַר הַמַּטָּרָֽה:
ועמדו: שם היו עומדים שלא לילך יותר:
40וַתַּֽעֲמֹ֛דְנָה שְׁתֵּ֥י הַתּוֹדֹ֖ת בְּבֵ֣ית הָאֱלֹהִ֑ים וַֽאֲנִ֕י וַֽחֲצִ֥י הַסְּגָנִ֖ים עִמִּֽי:
שתי התודות: שנשאו אותם לבהמ"ק:
41וְהַכֹּ֣הֲנִ֡ים אֶלְיָקִ֡ים מַֽעֲשֵׂיָ֡ה מִ֠נְיָמִין מִֽיכָיָ֧ה אֶלְיֽוֹעֵינַ֛י זְכַרְיָ֥ה חֲנַנְיָ֖ה בַּֽחֲצֹֽצְרֽוֹת:
בחצוצרות: היו תוקעין מתוך שמחתן:
42וּמַֽעֲשֵׂיָ֨ה וּשְׁמַעְיָ֜ה וְאֶלְעָזָ֧ר וְעֻזִּ֛י וִיהֽוֹחָנָ֥ן וּמַלְכִּיָּ֖ה וְעֵילָ֣ם וָעָ֑זֶר וַיַּשְׁמִ֙יעוּ֙ הַמְשֹׁ֣רְרִ֔ים וְיִזְרַחְיָ֖ה הַפָּקִֽיד:
43וַיִּזְבְּח֣וּ בַיּ֣וֹם הַ֠הוּא זְבָחִ֨ים גְּדוֹלִ֜ים וַיִּשְׂמָ֗חוּ כִּ֚י הָֽאֱלֹהִים֙ שִׂמְּחָם֙ שִׂמְחָ֣ה גְדוֹלָ֔ה וְגַ֧ם הַנָּשִׁ֛ים וְהַיְלָדִ֖ים שָׂמֵ֑חוּ וַתִּשָּׁמַ֛ע שִׂמְחַ֥ת יְרֽוּשָׁלִַ֖ם מֵרָחֽוֹק:
44וַיִּפָּֽקְד֣וּ בַיּוֹם֩ הַה֨וּא אֲנָשִׁ֜ים עַל־הַנְּשָׁכ֗וֹת לָא֨וֹצָר֥וֹת לַתְּרוּמוֹת֘ לָֽרֵאשִׁ֣ית וְלַמַּֽעַשְׂרוֹת֒ לִכְנ֨וֹס בָּהֶ֜ם לִשְׂדֵ֚י הֶֽעָרִים֙ מְנָא֣וֹת הַתּוֹרָ֔ה לַכֹּֽהֲנִ֖ים וְלַֽלְוִיִּ֑ם כִּי שִׂמְחַ֣ת יְהוּדָ֔ה עַל־הַכֹּֽהֲנִ֥ים וְעַל־הַלְוִיִּ֖ם הָעֹֽמְדִֽים:
ויפקדו: לשון פקידות:
הנשכות: כמו הלשכות של בית המקדש:
לכנוס בהם: ובאותן הלשכות היו נותנים כל מתנותיהם של כהנים ולוים ומשם היו חולקין ביניהם:
מנאות: כמו מנות:
לכהנים ללוים: כהנים היו נוטלים הראוי להם והלוים הראוי להם:
העומדים: ומשמשים שם לפני הקב"ה בתודות והודאות:
45וַיִּשְׁמְר֞וּ מִשְׁמֶ֚רֶת אֱלֹֽהֵיהֶם֙ וּמִשְׁמֶ֣רֶת הַטָּֽהֳרָ֗ה וְהַֽמְשֹֽׁרְרִ֖ים וְהַשֹּֽׁעֲרִ֑ים כְּמִצְוַ֥ת דָּוִ֖יד שְׁלֹמֹ֥ה בְנֽוֹ:
46כִּֽי־בִימֵ֥י דָּוִ֛יד וְאָסָ֖ף מִקֶּ֑דֶם רָאשֵׁי֙ (כתיב רָאשֵׁ֙) הַֽמְשֹֽׁרְרִ֔ים וְשִֽׁיר־תְּהִלָּ֥ה וְהוֹד֖וֹת לֵֽאלֹהִֽים:
47וְכָל־יִשְׂרָאֵל֩ בִּימֵ֨י זְרֻבָּבֶ֜ל וּבִימֵ֣י נְחֶמְיָ֗ה נֹֽתְנִ֛ים מְנָי֛וֹת הַֽמְשֹֽׁרְרִ֥ים וְהַשֹּֽׁעֲרִ֖ים דְּבַר־י֣וֹם בְּיוֹמ֑וֹ וּמַקְדִּשִׁים֙ לַֽלְוִיִּ֔ם וְהַֽלְוִיִּ֔ם מַקְדִּשִׁ֖ים לִבְנֵ֛י אַֽהֲרֹֽן:
מניות: כמו מנות:
ומקדישים ללוים: היו נותנים במעשר ללוים והם היו נוטלים מעשר מן המעשר ונותנים לכהנים: