פרק יא

1וַיֵּֽשְׁב֥וּ שָׂרֵֽי־הָעָ֖ם בִּירֽוּשָׁלִָ֑ם וּשְׁאָ֣ר הָ֠עָם הִפִּ֨ילוּ גֽוֹרָל֜וֹת לְהָבִ֣יא | אֶחָ֣ד מִן־הָֽעֲשָׂרָ֗ה לָשֶׁ֙בֶת֙ בִּירֽוּשָׁלִַ֙ם֙ עִ֣יר הַקֹּ֔דֶשׁ וְתֵ֥שַׁע הַיָּד֖וֹת בֶּֽעָרִֽים:

אחד מן העשרה. שבישראל למען ישבו בירושלים לשמור העיר:

ותשע הידות. תשעה חלקים שבישראל:

2וַיְבָֽרְכ֖וּ הָעָ֑ם לְכֹל֙ הָֽאֲנָשִׁ֔ים הַמִּֽתְנַדְּבִ֔ים לָשֶׁ֖בֶת בִּירֽוּשָׁלִָֽם:

המתנדבים. אשר נדבה רוחם אותם להיות יושבים בירושלים לשמור העיר מן האויבים:

3וְאֵ֙לֶּה֙ רָאשֵׁ֣י הַמְּדִינָ֔ה אֲשֶׁ֥ר יָֽשְׁב֖וּ בִּירֽוּשָׁלִָ֑ם וּבְעָרֵ֣י יְהוּדָ֗ה יָֽשְׁב֞וּ אִ֚ישׁ בַּֽאֲחֻזָּתוֹ֙ בְּעָ֣רֵיהֶ֔ם יִשְׂרָאֵ֚ל הַכֹּֽהֲנִים֙ וְהַֽלְוִיִּ֣ם וְהַנְּתִינִ֔ים וּבְנֵ֖י עַבְדֵ֥י שְׁלֹמֹֽה:

ואלה ראשי המדינה אשר ישבו בירושלים. הוא שנאמר בסמוך ובירושלים ישבו בני יהודה וגו':

4וּבִירֽוּשָׁלִַ֙ם֙ יָֽשְׁב֔וּ מִבְּנֵ֥י יְהוּדָ֖ה וּמִבְּנֵ֣י בִנְיָמִ֑ן מִבְּנֵ֣י יְ֠הוּדָה עֲתָיָ֨ה בֶן־עֻזִּיָּ֜ה בֶּן־זְכַרְיָ֧ה בֶן־אֲמַרְיָ֛ה בֶּן־שְׁפַטְיָ֥ה בֶן־מַֽהֲלַלְאֵ֖ל מִבְּנֵי־פָֽרֶץ:

מבני יהודה עתיה וגו'. חוזר ומפרש מבני יהודה מי ומי היו וכל הפרשה אינה מונה כי אם הגדולים והחשובים שבהם:

5וּמַֽעֲשֵׂיָ֣ה בֶן־בָּר֣וּךְ בֶּן־כָּל־חֹ֠זֶה בֶּן־חֲזָיָ֨ה בֶן־עֲדָיָ֧ה בֶן־יֽוֹיָרִ֛יב בֶּן־זְכַרְיָ֖ה בֶּן־הַשִּׁלֹנִֽי:

6כָּל־בְּנֵי־פֶ֕רֶץ הַיֹּֽשְׁבִ֖ים בִּירֽוּשָׁלִָ֑ם אַרְבַּ֥ע מֵא֛וֹת שִׁשִּׁ֥ים וּשְׁמֹנָ֖ה אַנְשֵׁי־חָֽיִל:

7וְאֵ֖לֶּה בְּנֵ֣י בִנְיָמִ֑ן סַלֻּ֡א בֶּן־מְשֻׁלָּ֡ם בֶּן־יוֹעֵ֡ד בֶּן־פְּדָיָה֩ בֶן־קוֹלָיָ֧ה בֶן־מַֽעֲשֵׂיָ֛ה בֶּן־אִֽיתִיאֵ֖ל בֶּן־יְשַׁעְיָֽה:

8וְאַֽחֲרָ֖יו גַּבַּ֣י סַלָּ֑י תְּשַׁ֥ע מֵא֖וֹת עֶשְׂרִ֥ים וּשְׁמֹנָֽה:

9וְיוֹאֵ֥ל בֶּן־זִכְרִ֖י פָּקִ֣יד עֲלֵיהֶ֑ם וִֽיהוּדָ֧ה בֶן־הַסְּנוּאָ֛ה עַל־הָעִ֖יר מִשְׁנֶֽה:

פקיד. ממונה:

משנה. אחר (הפקיד):

10מִן־הַכֹּֽהֲנִ֑ים יְדַעְיָ֥ה בֶן־יֽוֹיָרִ֖יב יָכִֽין:

11שְׂרָיָ֨ה בֶן־חִלְקִיָּ֜ה בֶּן־מְשֻׁלָּ֣ם בֶּן־צָד֗וֹק בֶּן־מְרָיוֹת֙ בֶּן־אֲחִיט֔וּב נְגִ֖ד בֵּ֥ית הָֽאֱלֹהִֽים:

נגיד. ממונה:

נגיד בית האלהים. ממונה על בית אלהים:

12וַֽאֲחֵיהֶ֗ם עֹשֵׂ֚ה הַמְּלָאכָה֙ לַבַּ֔יִת שְׁמֹנֶ֥ה מֵא֖וֹת עֶשְׂרִ֣ים וּשְׁנָ֑יִם וַֽ֠עֲדָיָה בֶּן־יְרֹחָ֚ם בֶּן־פְּלַלְיָה֙ בֶּן־אַמְצִ֣י בֶן־זְכַרְיָ֔ה בֶּן־פַּשְׁח֖וּר בֶּן־מַלְכִּיָּֽה:

ואחיהם עושה המלאכה לבית. וחבריהם שהיו עובדים עבודת הבית וקרבנותיו:

13וְאֶחָיו֙ רָאשִׁ֣ים לְאָב֔וֹת מָאתַ֖יִם אַרְבָּעִ֣ים וּשְׁנָ֑יִם וַֽעֲמַשְׁסַ֧י בֶּן־עֲזַרְאֵ֛ל בֶּן־אַחְזַ֥י בֶּן־מְשִׁלֵּמ֖וֹת בֶּן־אִמֵּֽר:

ראשים לאבות. ראשי בית אב ממשפחות הכהנים:

14וַֽאֲחֵיהֶם֙ גִּבֹּ֣רֵי חַ֔יִל מֵאָ֖ה עֶשְׂרִ֣ים וּשְׁמֹנָ֑ה וּפָקִ֣יד עֲלֵיהֶ֔ם זַבְדִּיאֵ֖ל בֶּן־הַגְּדוֹלִֽים:

ופקיד עליהם. ממונה עליהם:

15וּמִן־הַלְוִיִּ֑ם שְׁמַעְיָ֧ה בֶן־חַשּׁ֛וּב בֶּן־עַזְרִיקָ֥ם בֶּן־חֲשַׁבְיָ֖ה בֶּן־בּוּנִּֽי:

16וְשַׁבְּתַ֨י וְיֽוֹזָבָ֨ד עַל־הַמְּלָאכָ֚ה הַחִֽיצֹנָה֙ לְבֵ֣ית הָֽאֱלֹהִ֔ים מֵרָאשֵׁ֖י הַֽלְוִיִּֽם:

על המלאכה החיצונה. אשר לבית כגון בנייני בדק הבית ועצי המערכה שהיו מביאים מבחוץ:

17וּמַתַּנְיָ֣ה בֶן־מִ֠יכָה בֶּן־זַבְדִּ֨י בֶן־אָסָ֜ף רֹ֗אשׁ הַתְּחִלָּה֙ יְהוֹדֶ֣ה לַתְּפִלָּ֔ה וּבַקְבֻּקְיָ֖ה מִשְׁנֶ֣ה מֵֽאֶחָ֑יו וְעַבְדָּא֙ בֶּן־שַׁמּ֔וּעַ בֶּן־גָּלָ֖ל בֶּן־יְדוּתֽוּן (כתיב יְדיּתֽוּן) :

ראש התחלה יהודה לתפלה. הוא היה ראש וממונ' וגדול לפתוח תחלה להודות בתפלה ובזמירות שירותיהם של לוים, יהודה כמו יודה והה"א נכנסת בתיבה שלא לצורך כמו יוסף יהוסף:

18כָּל־הַֽלְוִיִּם֙ בְּעִ֣יר הַקֹּ֔דֶשׁ מָאתַ֖יִם שְׁמֹנִ֥ים וְאַרְבָּעָֽה:

19וְהַשּֽׁוֹעֲרִים֙ עַקּ֣וּב טַלְמ֔וֹן וַֽאֲחֵיהֶ֖ם הַשֹּֽׁמְרִ֣ים בַּשְּׁעָרִ֑ים מֵאָ֖ה שִׁבְעִ֥ים וּשְׁנָֽיִם:

והשוערים. ממונין על שערי המקדש:

20וּשְׁאָ֨ר יִשְׂרָאֵ֜ל הַכֹּֽהֲנִ֚ים הַֽלְוִיִּם֙ בְּכָל־עָרֵ֣י יְהוּדָ֔ה אִ֖ישׁ בְּנַֽחֲלָתֽוֹ:

איש בנחלתו. כל אחד בנחלתו היו יושבים:

21וְהַנְּתִינִ֖ים יֹֽשְׁבִ֣ים בָּעֹ֑פֶל וְצִיחָ֥א וְגִשְׁפָּ֖א עַל־הַנְּתִינִֽים:

בעופל. מקום אחד אשר בירושלים:

על הנתינים. ממונים על הנתינים:

22וּפְקִ֚יד הַֽלְוִיִּם֙ בִּיר֣וּשָׁלִַ֔ם עֻזִּ֚י בֶן־בָּנִי֙ בֶּן־חֲשַׁבְיָ֔ה בֶּן־מַתַּנְיָ֖ה בֶּן־מִיכָ֑ה מִבְּנֵ֚י אָסָף֙ הַֽמְשֹׁ֣רְרִ֔ים לְנֶ֖גֶד מְלֶ֥אכֶת בֵּית־הָֽאֱלֹהִֽים:

ופקיד הלוים. ממונה על הלוים אשר בירושלים:

לנגד מלאכת. על מלאכת הבית ממונה כגון בנייני בדק הבית ושאר דברים שמוציאין ממון למעשה (למעשר) הבית כענין שנאמר למעלה ושבתי ויוזבד על המלאכה החיצונה וגו':

23כִּֽי־מִצְוַ֥ת הַמֶּ֖לֶךְ עֲלֵיהֶ֑ם וַֽאֲמָנָ֥ה עַל־הַֽמְשֹֽׁרְרִ֖ים דְּבַר־י֥וֹם בְּיוֹמֽוֹ:

כי מצות המלך עליהם. והמלך היה מאמין בהם:

על המשוררים. להוציא ממון מאוצר המלך דריוש:

דבר יום ביומו. כדי לעשות צרכי הבית:

24וּפְתַחְיָ֨ה בֶּן־מְשֵֽׁיזַבְאֵ֜ל מִבְּנֵי־זֶ֚רַח בֶּן־יְהוּדָה֙ לְיַ֣ד הַמֶּ֔לֶךְ לְכָל־דָּבָ֖ר לָעָֽם:

ליד המלך. הוא היה מצרן לעצת המלך דריוש:

לכל דבר. לכל דבריהם אשר לעם לדבר עליהם אל המלך:

25וְאֶל־הַֽחֲצֵרִ֖ים בִּשְׂדֹתָ֑ם מִבְּנֵ֣י יְהוּדָ֗ה יָֽשְׁב֞וּ בְּקִרְיַ֚ת הָֽאַרְבַּע֙ וּבְנֹתֶ֔יהָ וּבְדִיבֹן֙ וּבְנֹתֶ֔יהָ וּבִֽיקַבְצְאֵ֖ל וַֽחֲצֵרֶֽיהָ:

26וּבְיֵשׁ֥וּעַ וּבְמֹלָדָ֖ה וּבְבֵ֥ית פָּֽלֶט:

27וּבַֽחֲצַ֥ר שׁוּעָ֛ל וּבִבְאֵ֥ר שֶׁ֖בַע וּבְנֹתֶֽיהָ:

28וּבְצִֽקְלָ֥ג וּבִמְכֹנָ֖ה וּבִבְנֹתֶֽיהָ:

29וּבְעֵ֥ין רִמּ֛וֹן וּבְצָרְעָ֖ה וּבְיַרְמֽוּת:

30זָנֹ֚חַ עֲדֻלָּם֙ וְחַצְרֵיהֶ֔ם לָכִישׁ֙ וּשְׂדֹתֶ֔יהָ עֲזֵקָ֖ה וּבְנֹתֶ֑יהָ וַיַּֽחֲנ֥וּ מִבְּאֵֽר־שֶׁ֖בַע עַד־גֵּֽיא־הִנֹּֽם:

31וּבְנֵ֥י בִנְיָמִ֖ן מִגָּ֑בַע מִכְמַ֣שׂ וְעַיָּ֔ה וּבֵֽית־אֵ֖ל וּבְנֹתֶֽיהָ:

32עֲנָת֥וֹת נֹ֖ב עֲנַנְיָֽה:

33חָצ֥וֹר | רָמָ֖ה גִּתָּֽיִם:

34חָדִ֥יד צְבֹעִ֖ים נְבַלָּֽט:

35לֹ֥ד וְאוֹנ֖וֹ גֵּ֥י הַֽחֲרָשִֽׁים:

36וּמִן־הַ֨לְוִיִּ֔ם מַחְלְק֥וֹת יְהוּדָ֖ה לְבִנְיָמִֽין:

מחלקות יהודה לבנימין. היו מחלקין במחלקותם אנה ואנה בארץ יהודה ובנימין: