פרק מ

1וַיַּ֖עַן יְהֹוָ֥ה אֶת־אִיּ֗וֹב וַיֹּֽאמַר:
2הֲרֹב עִם־שַׁדַּ֣י יִסּ֑וֹר מוֹכִ֖יחַ אֱל֣וֹהַּ יַֽעֲנֶֽנָּה:
3וַיַּ֖עַן אִיּ֥וֹב אֶת־יְהֹוָ֗ה וַיֹּֽאמַר:
4הֵ֣ן קַ֖לֹּתִי מָ֣ה אֲשִׁיבֶ֑ךָּ יָ֜דִ֗י שַׂ֣מְתִּי לְמוֹ־פִֽי:
5אַחַ֣ת דִּ֖בַּרְתִּי וְלֹ֣א אֶֽעֱנֶ֑ה וּ֜שְׁתַּ֗יִם וְלֹ֣א אוֹסִֽיף:
6וַיַּֽעַן־יְהֹוָ֣ה אֶת־אִ֖יּוֹב מִ֥ן | (כתיב מִ֥נ) סְעָרָ֗ה וַיֹּֽאמַר:
7אֲזָר־נָ֣א כְגֶ֣בֶר חֲלָצֶ֑יךָ אֶ֜שְׁאָֽלְךָ֗ וְהוֹדִיעֵֽנִי:
8הַאַף תָּפֵ֣ר מִשְׁפָּטִ֑י תַּ֜רְשִׁיעֵ֗נִי לְמַ֣עַן תִּצְדָּֽק:
9וְאִם־זְר֖וֹעַ כָּאֵ֥ל | לָ֑ךְ וּבְ֜ק֗וֹל כָּמֹ֥הוּ תַרְעֵֽם:
10עֲדֵ֥ה נָ֣א גָא֣וֹן וָגֹ֑בַהּ וְה֖וֹד וְהָדָ֣ר תִּלְבָּֽשׁ:
11הָפֵץ עֶבְר֣וֹת אַפֶּ֑ךָ וּרְאֵ֥ה כָל־גֵּ֜אֶ֗ה וְהַשְׁפִּילֵֽהוּ:
12רְאֵ֣ה כָל־גֵּ֖אֶה הַכְנִיעֵ֑הוּ וַֽהֲדֹ֖ךְ רְשָׁעִ֣ים תַּחְתָּֽם:
13טָמְנֵ֣ם בֶּֽעָפָ֣ר יָ֑חַד פְּ֜נֵיהֶ֗ם חֲבֹ֣שׁ בַּטָּמֽוּן:
14וְגַם־אֲנִ֥י אוֹדֶ֑ךָּ כִּֽי־תוֹשִׁ֖יעַ לְךָ֣ יְמִינֶֽךָ:
15הִנֵּה־נָ֣א בְ֖הֵמוֹת אֲשֶׁר־עָשִׂ֣יתִי עִמָּ֑ךְ חָ֜צִ֗יר כַּבָּקָ֥ר יֹאכֵֽל:
16הִנֵּה־נָ֣א כֹח֣וֹ בְמָתְנָ֑יו וְ֜אוֹנ֗וֹ בִּשְׁרִירֵ֥י בִטְנֽוֹ:
17יַחְפֹּ֣ץ זְנָב֣וֹ כְמוֹ־אָ֑רֶז גִּידֵ֖י פַֽחֲדָ֣יו (כתיב פַֽחֲדָ֣ו) יְשׂרָֽגוּ:
18עֲצָמָיו אֲפִיקֵ֣י נְחוּשָׁ֑ה גְּ֜רָמָ֗יו כִּמְטִ֥יל בַּרְזֶֽל:
19ה֖וּא רֵאשִׁ֣ית דַּרְכֵי־אֵ֑ל הָ֜עֹשׂוֹ יַגֵּ֥שׁ חַרְבּֽוֹ:
20כִּי־ב֖וּל הָרִ֣ים יִשְׂאוּ־ל֑וֹ וְֽכָל־חַיַּ֥ת הַ֜שָּׂדֶ֗ה יְשַֽׂחֲקוּ־שָֽׁם:
21תַּֽחַת־צֶֽאֱלִ֥ים יִשְׁכָּ֑ב בְּסֵ֖תֶר קָנֶ֣ה וּבִצָּֽה:
22יְסֻכֻּ֣הוּ צֶֽאֱלִ֣ים צִלְל֑וֹ יְ֜סֻבּ֗וּהוּ עַרְבֵי־נָֽחַל:
23הֵ֚ן יַֽעֲשֹׁ֣ק נָ֖הָר וְלֹ֣א יַחְפּ֑וֹז יִבְטַ֓ח | כִּֽי־יָגִ֖יחַ יַרְדֵּ֣ן אֶל־פִּֽיהוּ:
24בְּעֵינָ֥יו יִקָּחֶ֑נּוּ בְּ֜מֽוֹקְשִׁ֗ים יִנְקָב־אָֽף:
25תִּמְשֹׁ֣ךְ לִוְיָתָ֣ן בְּחַכָּ֑ה וּ֜בְחֶ֗בֶל תַּשְׁקִ֥יעַ לְשׁוֹנֽוֹ:
26הֲתָשִׂ֣ים אַגְמֹ֣ן בְּאַפּ֑וֹ וּ֜בְח֗וֹחַ תִּקֹּ֥ב לֶֽחֱיֽוֹ:
27הֲיַרְבֶּ֣ה אֵ֖לֶיךָ תַּֽחֲנוּנִ֑ים אִם־יְדַבֵּ֖ר אֵלֶ֣יךָ רַכּֽוֹת:
28הֲיִכְרֹ֣ת בְּרִ֣ית עִמָּ֑ךְ תִּ֜קָּחֶ֗נּוּ לְעֶ֣בֶד עוֹלָֽם:
29הַֽתְשַׂחֶק־בּ֖וֹ כַּצִּפּ֑וֹר וְ֜תִקְשְׁרֶ֗נּוּ לְנַֽעֲרוֹתֶֽיךָ:
30יִכְר֣וּ עָ֖לָיו חַבָּרִ֑ים יֶֽ֜חֱצ֗וּהוּ בֵּ֣ין כְּנַֽעֲנִֽים:
31הַֽתְמַלֵּ֣א בְשֻׂכּ֣וֹת עוֹר֑וֹ וּבְצִלְצַ֖ל דָּגִ֣ים רֹאשֽׁוֹ:
32שִֽׂים־עָלָ֥יו כַּפֶּ֑ךָ זְכֹ֥ר מִ֜לְחָמָ֗ה אַל־תּוֹסַֽף: