פרק ד

1לַמְנַצֵּ֥חַ בִּנְגִינ֗וֹת מִזְמ֥וֹר לְדָוִֽד:
2בְּקָרְאִ֡י עֲנֵ֚נִי | אֱלֹ֘הֵ֚י צִדְקִ֗י בַּ֖צָּר הִרְחַ֣בְתָּ לִּ֑י חָ֜נֵּ֗נִי וּשְׁמַ֥ע תְּפִלָּתִֽי:
3בְּנֵי־אִ֡ישׁ עַד־מֶ֤ה כְבוֹדִ֗י לִ֖כְלִמָּה תֶּֽאֱהָב֣וּן רִ֑יק תְּבַקְשׁ֖וּ כָזָ֣ב סֶֽלָה:
4וּדְע֗וּ כִּֽי־הִפְלָ֣ה יְ֖הֹוָה חָסִ֣יד ל֑וֹ יְהֹ֘וָ֥ה יִ֜שְׁמַ֗ע בְּקָרְאִ֥י אֵלָֽיו:
5רִגְז֗וּ וְֽאַל־תֶּֽ֫חֱטָ֥אוּ אִמְר֣וּ בִ֖לְבַבְכֶם עַל־מִשְׁכַּבְכֶ֗ם וְדֹ֣מּוּ סֶֽלָה:
6זִבְח֥וּ זִבְחֵי־צֶ֑דֶק וּ֜בִטְח֗וּ אֶל־יְהֹוָֽה:
7רַבִּ֥ים אֹֽמְרִים֘ מִֽי־יַרְאֵ֪נוּ֫ ט֥וֹב נְסָה־עָלֵ֑ינוּ א֖וֹר פָּנֶ֣יךָ יְהֹוָֽה:
8נָתַ֣תָּה שִׂמְחָ֣ה בְלִבִּ֑י מֵעֵ֨ת דְּגָנָ֖ם וְתִֽירוֹשָׁ֣ם רָֽבּוּ:
9בְּשָׁל֣וֹם יַחְדָּו֘ אֶשְׁכְּבָ֪ה וְאִ֫ישָׁ֥ן כִּֽי־אַתָּ֣ה יְהֹוָ֣ה לְבָדָ֪ד לָ֜בֶ֗טַח תּֽוֹשִׁיבֵֽנִי: