פרק י

1וּכְהִתְפַּלֵּ֚ל עֶזְרָא֙ וּכְהִתְוַדֹּת֔וֹ בֹּכֶה֙ וּמִתְנַפֵּ֔ל לִפְנֵ֖י בֵּ֣ית הָֽאֱלֹהִ֑ים נִקְבְּצוּ֩ אֵלָ֨יו מִיִּשְׂרָאֵ֜ל קָהָ֣ל רַב־מְאֹ֗ד אֲנָשִׁ֚ים וְנָשִׁים֙ וִֽילָדִ֔ים כִּֽי־בָכ֥וּ הָעָ֖ם הַרְבֵּה־בֶֽכֶה:

בכה. כמו בכי:

2וַיַּעַן֩ שְׁכַנְיָ֨ה בֶן־יְחִיאֵ֜ל מִבְּנֵ֚י עֵילָם֙ (כתיב עֵולָם֙) וַיֹּ֣אמֶר לְעֶזְרָ֔א אֲנַ֙חְנוּ֙ מָעַ֣לְנוּ בֵֽאלֹהֵ֔ינוּ וַנֹּ֛שֶׁב נָשִׁ֥ים נָכְרִיּ֖וֹת מֵֽעַמֵּ֣י הָאָ֑רֶץ וְעַתָּ֛ה יֶשׁ־מִקְוֶ֥ה לְיִשְׂרָאֵ֖ל עַל־זֹֽאת:

ונושב. והושבנום:

יש מקוה. יש תקוה לישראל על כך שהם יכולים להוציא נשיהם העכו"ם והנולד מהם ולהוציא כל הבנים הנולדים מן הנשים העכו"ם:

3וְעַתָּ֣ה נִכְרָת־בְּרִ֣ית לֵ֠אלֹהֵינוּ לְהוֹצִ֨יא כָל־נָשִׁ֜ים וְהַנּוֹלָ֚ד מֵהֶם֙ בַּֽעֲצַ֣ת אֲדֹנָ֔י וְהַֽחֲרֵדִ֖ים בְּמִצְוַ֣ת אֱלֹהֵ֑ינוּ וְכַתּוֹרָ֖ה יֵעָשֶֽׂה:

בעצת אד'. בעצתו וברצונו של הקב"ה:

וחרדים במצות אלהינו. ויראי שמים יוציאם:

וכתורה יעשה. העושה המעשה הזה אשר יוציא אשתו ובניו העובדי כוכבים:

4ק֛וּם כִּֽי־עָלֶ֥יךָ הַדָּבָ֖ר וַֽאֲנַ֣חְנוּ עִמָּ֑ךְ חֲזַ֖ק וַֽעֲשֵֽׂה:

ואנחנו עמך. להיות מסכימים עמך:

5וַיָּ֣קָם עֶזְרָ֡א וַיַּשְׁבַּ֣ע אֶת־שָׂרֵי֩ הַכֹּֽהֲנִ֨ים הַֽלְוִיִּ֜ם וְכָל־יִשְׂרָאֵ֗ל לַֽעֲשׂ֛וֹת כַּדָּבָ֥ר הַזֶּ֖ה וַיִּשָּׁבֵֽעוּ:

6וַיָּ֣קָם עֶזְרָ֗א מִלִּפְנֵי֙ בֵּ֣ית הָֽאֱלֹהִ֔ים וַיֵּ֕לֶךְ אֶל־לִשְׁכַּ֖ת יְהֽוֹחָנָ֣ן בֶּן־אֶלְיָשִׁ֑יב וַיֵּ֣לֶךְ שָׁ֗ם לֶ֚חֶם לֹֽא־אָכַל֙ וּמַ֣יִם לֹֽא־שָׁתָ֔ה כִּ֥י מִתְאַבֵּ֖ל עַל־מַ֥עַל הַגּוֹלָֽה:

7וַיַּֽעֲבִ֨ירוּ ק֜וֹל בִּֽיהוּדָ֣ה וִירֽוּשָׁלִַ֗ם לְכֹל֙ בְּנֵ֣י הַגּוֹלָ֔ה לְהִקָּבֵ֖ץ יְרֽוּשָׁלִָֽם:

קול. כרוז:

8וְכֹל֩ אֲשֶׁ֨ר לֹֽא־יָב֜וֹא לִשְׁלֹ֣שֶׁת הַיָּמִ֗ים כַּֽעֲצַ֚ת הַשָּׂרִים֙ וְהַזְּקֵנִ֔ים יָֽחֳרַ֖ם כָּל־רְכוּשׁ֑וֹ וְה֥וּא יִבָּדֵ֖ל מִקְּהַ֥ל הַגּוֹלָֽה:

לשלשת הימים. לסוף שלשת הימים:

9וַיִּקָּבְצ֣וּ כָל־אַנְשֵֽׁי־יְהוּדָה֩ וּבִנְיָמִ֨ן | יְרֽוּשָׁלִַ֜ם לִשְׁלֹ֣שֶׁת הַיָּמִ֗ים ה֛וּא חֹ֥דֶשׁ הַתְּשִׁיעִ֖י בְּעֶשְׂרִ֣ים בַּחֹ֑דֶשׁ וַיֵּֽשְׁב֣וּ כָל־הָעָ֗ם בִּרְחוֹב֙ בֵּ֣ית הָֽאֱלֹהִ֔ים מַרְעִידִ֥ים עַל־הַדָּבָ֖ר וּמֵהַגְּשָׁמִֽים:

חדש התשיעי. הוא חדש כסליו:

מרעידים על הדבר. מתייראים על הדבר ומתייראים היו ממכשול של עבירה זאת:

ומהגשמים. ומן הגשמים היורדים עליהם שם היו רעודים ועלובים:

10וַיָּ֨קָם עֶזְרָ֚א הַכֹּהֵן֙ וַיֹּ֣אמֶר אֲלֵהֶ֔ם אַתֶּ֣ם מְעַלְתֶּ֔ם וַתֹּשִׁ֖יבוּ נָשִׁ֣ים נָכְרִיּ֑וֹת לְהוֹסִ֖יף עַל־אַשְׁמַ֥ת יִשְׂרָאֵֽל:

11וְעַתָּ֗ה תְּנ֥וּ תוֹדָ֛ה לַֽיהֹוָ֥ה אֱלֹהֵֽי־אֲבֹתֵיכֶ֖ם וַֽעֲשׂ֣וּ רְצוֹנ֑וֹ וְהִבָּֽדְלוּ֙ מֵֽעַמֵּ֣י הָאָ֔רֶץ וּמִן־הַנָּשִׁ֖ים הַנָּכְרִיּֽוֹת:

תודה. וידוי:

12וַיַּֽעְנ֧וּ כָֽל־הַקָּהָ֛ל וַיֹּֽאמְר֖וּ ק֣וֹל גָּד֑וֹל כֵּ֛ן כִּדְבָֽרְךָ֥ (כתיב כִּדְבָֽרְיךָ֥) עָלֵ֖ינוּ לַֽעֲשֽׂוֹת:

13אֲבָ֞ל הָעָ֥ם רָב֙ וְהָעֵ֣ת גְּשָׁמִ֔ים וְאֵ֥ין כֹּ֖חַ לַֽעֲמ֣וֹד בַּח֑וּץ וְהַמְּלָאכָ֗ה לֹֽא־לְי֚וֹם אֶחָד֙ וְלֹ֣א לִשְׁנַ֔יִם כִּֽי־הִרְבִּ֥ינוּ לִפְשֹׁ֖עַ בַּדָּבָ֥ר הַזֶּֽה:

והעת גשמים. שהגשמי' יורדי' עלינו:

והמלאכה. והרחקת עבירה זו אין אתה יכול לתקן כל כך במהירות:

14יַֽעֲמְדוּ־נָ֣א שָֹ֠רֵינוּ לְֽכָל־הַקָּהָ֞ל וְכֹ֣ל | אֲשֶׁ֣ר בֶּעָרֵ֗ינוּ הַֽהֹשִׁ֞יב נָשִׁ֚ים נָכְרִיּוֹת֙ יָבֹא֙ לְעִתִּ֣ים מְזֻמָּנִ֔ים וְעִמָּהֶ֛ם זִקְנֵי־עִ֥יר וָעִ֖יר וְשֹֽׁפְטֶ֑יהָ עַ֠ד לְהָשִׁ֞יב חֲר֚וֹן אַף־אֱלֹהֵ֙ינוּ֙ מִמֶּ֔נּוּ עַ֖ד לַדָּבָ֥ר הַזֶּֽה:

לכל הקהל. עם כל הקהל:

ההושיב. אשר הושיב:

עד להשיב. עד אשר ישוב חרונו של הקב"ה מעלינו:

15אַ֣ךְ יֽוֹנָתָ֧ן בֶּן־עֲשָׂהאֵ֛ל וְיַחְזְיָ֥ה בֶן־תִּקְוָ֖ה עָֽמְד֣וּ עַל־זֹ֑את וּמְשֻׁלָּ֛ם וְשַׁבְּתַ֥י הַלֵּוִ֖י עֲזָרֻֽם:

עמדו על זאת. לקנתר על דבר זה:

עזרום. החזיקו ידיהם:

16וַיַּֽעֲשׂוּ־כֵן֘ בְּנֵ֣י הַגּוֹלָה֒ וַיִּבָּֽדְלוּ֩ עֶזְרָ֨א הַכֹּהֵ֜ן אֲנָשִׁ֨ים רָאשֵׁ֧י הָֽאָב֛וֹת לְבֵ֥ית אֲבֹתָ֖ם וְכֻלָּ֣ם בְּשֵׁמ֑וֹת וַיֵּֽשְׁב֗וּ בְּי֚וֹם אֶחָד֙ לַחֹ֣דֶשׁ הָֽעֲשִׂירִ֔י לְדַרְי֖וֹשׁ הַדָּבָֽר:

לדריוש. כמו לדרוש:

17וַיְכַלּ֣וּ בַכֹּ֔ל אֲנָשִׁ֕ים הַֽהֹשִׁ֖יבוּ נָשִׁ֣ים נָכְרִיּ֑וֹת עַ֛ד י֥וֹם אֶחָ֖ד לַחֹ֥דֶשׁ הָֽרִאשֽׁוֹן:

ויכלו בכל. והשלימו את תיקון המעשה מן האנשים אשר הושיבו נשים של עובדי כוכבים כי הוציאם:

18וַיִּמָּצֵא֙ מִבְּנֵ֣י הַכֹּֽהֲנִ֔ים אֲשֶׁ֥ר הֹשִׁ֖יבוּ נָשִׁ֣ים נָכְרִיּ֑וֹת מִבְּנֵי֙ יֵשׁ֚וּעַ בֶּן־יֽוֹצָדָק֙ וְאֶחָ֔יו מַֽעֲשֵׂיָה֙ וֶֽאֱלִיעֶ֔זֶר וְיָרִ֖יב וּגְדַלְיָֽה:

19וַיִּתְּנ֥וּ יָדָ֖ם לְהוֹצִ֣יא נְשֵׁיהֶ֑ם וַֽאֲשֵׁמִ֥ים אֵֽיל־צֹ֖אן עַל־אַשְׁמָתָֽם:

ידם. עצתם כמו הנה יד יואב אתך בכל זאת (שמואל ב י״ד:י״ט):

על אשמתם. הוראת שעה היתה:

20וּמִבְּנֵ֣י אִמֵּ֔ר חֲנָ֖נִי וּזְבַדְיָֽה:

ומבני אמר. כל אלו כהנים עד ומן הלוים וגומר:

21וּמִבְּנֵ֖י חָרִ֑ם מַֽעֲשֵׂיָ֚ה וְאֵֽלִיָּה֙ וּשְׁמַֽעְיָ֔ה וִֽיחִיאֵ֖ל וְעֻזִיָּֽה:

22וּמִבְּנֵ֖י פַּשְׁח֑וּר אֶלְיֽוֹעֵינַ֚י מַֽעֲשֵׂיָה֙ יִשְׁמָעֵ֣אל נְתַנְאֵ֔ל יֽוֹזָבָ֖ד וְאֶלְעָשָֽׂה:

23וּמִן־הַֽלְוִיִּ֑ם יֽוֹזָבָ֣ד וְשִׁמְעִ֗י וְקֵֽלָיָה֙ ה֣וּא קְלִיטָ֔א פְּתַחְיָ֥ה יְהוּדָ֖ה וֶֽאֱלִיעֶֽזֶר:

24וּמִן־הַֽמְשֹֽׁרְרִ֖ים אֶלְיָשִׁ֑יב וּמִן־הַשֹּׁ֣עֲרִ֔ים שַׁלֻּ֥ם וָטֶ֖לֶם וְאוּרִֽי:

25וּמִיִּשְׂרָאֵ֑ל מִבְּנֵ֣י פַרְעֹ֡שׁ רַ֠מְיָה וְיִזִּיָּ֚ה וּמַלְכִּיָּה֙ וּמִיָּמִ֣ן וְאֶלְעָזָ֔ר וּמַלְכִּיָּ֖ה וּבְנָיָֽה:

26וּמִבְּנֵ֖י עֵילָ֑ם מַתַּנְיָ֚ה זְכַרְיָה֙ וִֽיחִיאֵ֣ל וְעַבְדִּ֔י וִֽירֵמ֖וֹת וְאֵלִיָּֽה:

27וּמִבְּנֵ֖י זַתּ֑וּא אֶלְיֽוֹעֵנַ֚י אֶלְיָשִׁיב֙ מַתַּנְיָ֣ה וִֽירֵמ֔וֹת וְזָבָ֖ד וַֽעֲזִיזָֽא:

28וּמִבְּנֵ֖י בֵּבָ֑י יְהֽוֹחָנָ֥ן חֲנַנְיָ֖ה זַבַּ֥י עַתְלָֽי:

29וּמִבְּנֵ֖י בָּנִ֑י מְשֻׁלָּ֚ם מַלּוּךְ֙ וַֽעֲדָיָ֔ה יָשׁ֖וּב וּשְׁאָ֥ל וְרָמֽוֹת (כתיב יְרָמֽוֹת) :

30וּמִבְּנֵ֛י פַּחַ֥ת מוֹאָ֖ב עַדְנָ֣א וּכְלָ֑ל בְּנָיָ֚ה מַֽעֲשֵׂיָה֙ מַתַּנְיָ֣ה בְצַלְאֵ֔ל וּבִנּ֖וּי וּמְנַשֶּֽׁה:

31וּבְנֵ֖י חָרִ֑ם אֱלִיעֶ֧זֶר יִשִּׁיָּ֛ה מַלְכִּיָּ֖ה שְׁמַעְיָ֥ה שִׁמְעֽוֹן:

32בִּנְיָמִ֥ן מַלּ֖וּךְ שְׁמַרְיָֽה:

33מִבְּנֵ֖י חָשֻׁ֑ם מַתְּנַ֚י מַתַּתָּה֙ זָבָ֣ד אֱלִיפֶ֔לֶט יְרֵמַ֥י מְנַשֶּׁ֖ה שִׁמְעִֽי:

34מִבְּנֵ֣י בָנִ֔י מַֽעֲדַ֥י עַמְרָ֖ם וְאוּאֵֽל:

35בְּנָיָ֥ה בֵֽדְיָ֖ה כְּלֽוּהוּ (כתיב כְלֽוּהיּ) :

36וַנְיָ֥ה מְרֵמ֖וֹת אֶלְיָשִֽׁיב:

37מַתַּנְיָ֥ה מַתְּנַ֖י וְיַֽעֲשָֽׂי (כתיב וְיַֽעֲשָֽׂו) :

38וּבָנִ֥י וּבִנּ֖וּי שִׁמְעִֽי:

39וְשֶֽׁלֶמְיָ֥ה וְנָתָ֖ן וַֽעֲדָיָֽה:

40מַכְנַדְבַ֥י שָׁשַׁ֖י שָׁרָֽי:

41עֲזַרְאֵ֥ל וְשֶֽׁלֶמְיָ֖הוּ שְׁמַרְיָֽה:

42שַׁלּ֥וּם אֲמַרְיָ֖ה יוֹסֵֽף:

43מִבְּנֵ֖י נְב֑וֹ יְעִיאֵ֚ל מַתִּתְיָה֙ זָבָ֣ד זְבִינָ֔א יַדַּ֥י (כתיב יַדַּ֥ו) וְיוֹאֵ֖ל בְּנָיָֽה:

44כָּל־אֵ֕לֶּה נָֽשְׂא֖וּ (כתיב נָֽשְׂא֖יּ) נָשִׁ֣ים נָכְרִיּ֑וֹת וְיֵשׁ֨ מֵהֶ֣ם נָשִׁ֔ים וַיָּשִׂ֖ימוּ בָּנִֽים:

ויש מהם נשים וישימו בנים. מקצתן שהיו להם נשים של עובדי כוכבים שנולדו להם מהם בנים והכל הוציאו הנשים והבנים: