פרק לז

1אַף־לְ֖זֹאת יֶֽחֱרַ֣ד לִבִּ֑י וְ֜יִתַּ֗ר מִמְּקוֹמֽוֹ:
2שִׁמְע֚וּ שָׁמ֣וֹעַ בְּרֹ֣גֶז קֹל֑וֹ וְ֜הֶ֗גֶה מִפִּ֥יו יֵצֵֽא:
3תַּֽחַת־כָּל־הַשָּׁמַ֥יִם יִשְׁרֵ֑הוּ וְ֜אוֹר֗וֹ עַל־כַּנְפ֥וֹת הָאָֽרֶץ:
4אַֽחֲרָ֚יו | יִשְׁאַג־ק֗וֹל יַ֖רְעֵם בְּק֣וֹל גְּאוֹנ֑וֹ וְלֹ֥א יְ֜עַקְּבֵ֗ם כִּֽי־יִשָּׁמַ֥ע קוֹלֽוֹ:
5יַרְעֵ֚ם אֵ֣ל בְּ֖קוֹלוֹ נִפְלָא֑וֹת עֹשֶׂ֥ה גְ֜דֹל֗וֹת וְלֹ֣א נֵדָֽע:
6כִּ֚י לַשֶּׁ֨לֶג | יֹאמַ֗ר הֱוֵ֫א אָ֥רֶץ וְגֶ֥שֶׁם מָטָ֑ר וְ֜גֶ֗שֶׁם מִטְר֥וֹת עֻזּֽוֹ:
7בְּיַד־כָּל־אָדָ֥ם יַחְתּ֑וֹם לָ֜דַ֗עַת כָּל־אַנְשֵׁ֥י מַֽעֲשֵֽׂהוּ:
8וַתָּב֣וֹא חַיָּ֣ה בְמוֹ־אָ֑רֶב וּבִמְעֽוֹנוֹתֶ֣יהָ תִשְׁכֹּֽן:
9מִן־הַ֖חֶדֶר תָּב֣וֹא סוּפָ֑ה וּמִמְּזָרִ֥ים קָרָֽה:
10מִנִּשְׁמַת־אֵ֥ל יִתֶּן־קָ֑רַח וְרֹ֖חַב מַ֣יִם בְּמוּצָֽק:
11אַף־בְּ֖רִי יַטְרִ֣יחַ עָ֑ב יָ֜פִ֗יץ עֲנַ֣ן אוֹרֽוֹ:
12וְה֚וּא מְסִבּ֨וֹת | מִתְהַפֵּ֣ךְ בְּתַחְבּוּלֹתָ֣יו (כתיב בְּתַחְבּוּלֹתָ֣ו) לְפָֽעֳלָ֑ם כֹּ֖ל אֲשֶׁ֥ר יְצַוֵּ֓ם | עַל־פְּנֵ֖י תֵבֵ֣ל אָֽרְצָה:
13אִם־לְשֵׁ֥בֶט אִם־לְאַרְצ֑וֹ אִם־לְ֜חֶ֗סֶד יַמְצִאֵֽהוּ:
14הַֽאֲזִ֣ינָה זֹּ֣את אִיּ֑וֹב עֲ֜מֹ֗ד וְהִתְבּוֹנֵ֚ן | נִפְלְא֬וֹת אֵֽל:
15הֲתֵדַע בְּשֽׂוּם־אֱל֣וֹהַּ עֲלֵיהֶ֑ם וְ֜הוֹפִ֗יעַ א֣וֹר עֲנָנֽוֹ:
16הֲתֵדַע עַל־מִפְלְשֵׂי־עָ֑ב מִ֜פְלְא֗וֹת תְּמִ֣ים דֵּעִֽים:
17אֲשֶׁר־בְּגָדֶ֥יךָ חַמִּ֑ים בְּהַשְׁקִ֥ט אֶ֜֗רֶץ מִדָּרֽוֹם:
18תַּרְקִ֣יעַ עִ֖מּוֹ לִשְׁחָקִ֑ים חֲ֜זָקִ֗ים כִּרְאִ֥י מוּצָֽק:
19הֽ֖וֹדִיעֵנוּ מַה־נֹּ֣אמַר ל֑וֹ לֹ֥א־נַֽ֜עֲרֹ֗ךְ מִפְּנֵי־חֹֽשֶׁךְ:
20הַֽיְסֻפַּר־ל֖וֹ כִּ֣י אֲדַבֵּ֑ר אִם־אָ֥מַר אִ֜֗ישׁ כִּ֣י יְבֻלָּֽע:
21וְעַתָּ֚ה | לֹ֘א רָ֚אוּ א֗וֹר בָּהִ֣יר ה֖וּא בַּשְּׁחָקִ֑ים וְר֥וּחַ עָֽ֜בְרָ֗ה וַתְּטַֽהֲרֵֽם:
22מִצָּפוֹן זָהָ֣ב יֶֽאֱתֶ֑ה עַל־אֱ֜ל֗וֹהַּ נ֣וֹרָא הֽוֹד:
23שַׁדַּ֣י לֹֽא־מְ֖צָאנֻהוּ שַׂגִּיא־כֹ֑חַ וּמִשְׁפָּ֥ט וְרֹב־צְ֜דָקָ֗ה לֹ֣א יְעַנֶּֽה:
24לָכֵן יְרֵא֣וּהוּ אֲנָשִׁ֑ים לֹא־יִ֜רְאֶ֗ה כָּל־חַכְמֵי־לֵֽב: