פרק קלה

1הַ֥לְלוּיָ֨הּ | הַֽ֖לְלוּ אֶת־שֵׁ֣ם יְהֹוָ֑ה הַֽ֜לְל֗וּ עַבְדֵ֥י יְהֹוָֽה:
הללויה הללו את שם ה' וגו'. 
2שֶׁעֹ֣מְדִים בְּבֵ֣ית יְהֹוָ֑ה בְּ֜חַצְר֗וֹת בֵּ֣ית אֱלֹהֵֽינוּ:
3הַֽלְלוּיָהּ כִּי־ט֣וֹב יְהֹוָ֑ה זַמְּר֥וּ לִ֜שְׁמ֗וֹ כִּ֣י נָעִֽים:
4כִּֽי־יַֽעֲקֹ֗ב בָּחַ֣ר ל֣וֹ יָ֑הּ יִ֜שְׂרָאֵ֗ל לִסְגֻלָּתֽוֹ:
5כִּ֚י אֲנִ֣י יָדַעְתִּי כִּֽי־גָד֣וֹל יְהֹוָ֑ה וַֽ֜אֲדֹנֵ֗ינוּ מִכָּל־אֱלֹהִֽים:
6כֹּ֚ל אֲשֶׁר־חָפֵ֥ץ יְהֹוָ֗ה עָ֫שָׂ֥ה בַּשָּׁמַ֥יִם וּבָאָ֑רֶץ בַּ֜יַּמִּ֗ים וְכָל־תְּהֹמֽוֹת:
7מַֽעֲלֶ֣ה נְשִׂאִים֘ מִקְצֵ֪ה הָ֫אָ֥רֶץ בְּרָקִ֣ים לַמָּטָ֣ר עָשָׂ֑ה מ֥וֹצֵא ר֜֗וּחַ מֵאֽוֹצְרוֹתָֽיו:
ברקים למטר עשה.  הם זהרורי הרקיע המבריקים ומאירים לפני המטר שקורין אשליילד"ש בלע"ז:
מוצא.  ל' מציאה כלומ' אוצרות תקן לרוח ושם הם מצויים לו לשלחם במשלחתו:
8שֶֽׁהִכָּה בְּכוֹרֵ֣י מִצְרָ֑יִם מֵֽ֜אָדָ֗ם עַד־בְּהֵמָֽה:
9שָׁלַ֚ח | אוֹתֹ֣ת וּ֖מֹֽפְתִים בְּתוֹכֵ֣כִי מִצְרָ֑יִם בְּ֜פַרְעֹ֗ה וּבְכָל־עֲבָדָֽיו:
בתוככי.  כמו בתוכך:
10שֶֽׁהִכָּה גּוֹיִ֣ם רַבִּ֑ים וְ֜הָרַ֗ג מְלָכִ֥ים עֲצוּמִֽים:
11לְסִיח֚וֹן | מֶ֚לֶךְ הָֽאֱמֹרִ֗י וּ֖לְעוֹג מֶ֣לֶךְ הַבָּשָׁ֑ן וּ֜לְכֹ֗ל מַמְלְכ֥וֹת כְּנָֽעַן:
12וְנָתַ֣ן אַרְצָ֣ם נַֽחֲלָ֑ה נַֽ֜חֲלָ֗ה לְיִשְׂרָאֵ֥ל עַמּֽוֹ:
13יְהֹוָה שִׁמְךָ֣ לְעוֹלָ֑ם יְ֜הֹוָ֗ה זִכְרְךָ֥ לְדֹֽר־וָדֹֽר:
ה' שמך לעולם.  כגדולתך וכממשלתך אז כן הוא גם עתה והיכולת בידך לדון ולנקום נקמתנו:
14כִּֽי־יָדִ֣ין יְהֹוָ֣ה עַמּ֑וֹ וְעַל־עֲ֜בָדָ֗יו יִתְנֶחָֽם:
כי ידין ה' עמו.  ישפוט משפטם מאויביהם:
יתנחם.  יתעשת (יתעכב):
15עֲצַבֵּ֣י הַ֖גּוֹיִם כֶּ֣סֶף וְזָהָ֑ב מַֽ֜עֲשֵׂ֗ה יְדֵ֣י אָדָֽם:
16פֶּֽה־לָ֖הֶם וְלֹ֣א יְדַבֵּ֑רוּ עֵינַ֥יִם לָ֜הֶ֗ם וְלֹ֣א יִרְאֽוּ:
17אָזְנַ֣יִם לָ֖הֶם וְלֹ֣א יַֽאֲזִ֑ינוּ אַ֜֗ף אֵ֖ין יֶשׁ־ר֣וּחַ בְּפִיהֶֽם:
אף אין יש רוח בפיהם.  גם רוח אין בפיה' אפילו כבהמה זו כל שכן שלא ידברו כאדם ומאחר שאין בהם רוח אין צריך לפרש רוח החוטם, אף זה פתח, ואף להם ולא יריחון קמץ (סא"א):
18כְּמוֹהֶם יִֽהְי֣וּ עֹֽשֵׂיהֶ֑ם כֹּ֖ל אֲשֶׁר־בֹּטֵ֣חַ בָּהֶֽם:
19בֵּ֣ית יִ֖שְׂרָאֵל בָּֽרְכ֣וּ אֶת־יְהֹוָ֑ה בֵּ֥ית אַֽ֜הֲרֹ֗ן בָּֽרְכ֥וּ אֶת־יְהֹוָֽה:
20בֵּ֣ית הַ֖לֵּוִי בָּֽרְכ֣וּ אֶת־יְהֹוָ֑ה יִרְאֵ֥י יְ֜הֹוָ֗ה בָּֽרְכ֥וּ אֶת־יְהֹוָֽה:
יראי ה'.  אלו הגרים (מצאתי):
21בָּ֘ר֚וּךְ יְהֹוָ֨ה | מִצִּיּ֗וֹן שֹׁ֘כֵ֚ן יְרֽוּשָׁלִָ֗ם הַֽלְלוּיָֽהּ: