פרק ט

1וְכָל־יִשְׂרָאֵל֙ הִתְיַחְשׂ֔וּ וְהִנָּ֣ם כְּתוּבִ֔ים עַל־סֵ֖פֶר מַלְכֵ֣י יִשְׂרָאֵ֑ל וִֽיהוּדָ֛ה הָגְל֥וּ לְבָבֶ֖ל בְּמַֽעֲלָֽם:

וכל ישראל התיחשו. אמרתי לך קצת מן יחוסן מה שמצאתי אבל עיקר יחוסן על ספר מלכי ישראל ויהודה שהגלו לבבל במעלם ועמהם הייתי אני עזרא ויחוסם מצאתי כתוב וכתבתיו:

2וְהַיּֽוֹשְׁבִים֙ הָרִ֣אשֹׁנִ֔ים אֲשֶׁ֥ר בַּֽאֲחֻזָּתָ֖ם בְּעָרֵיהֶ֑ם יִשְׂרָאֵל֙ הַכֹּ֣הֲנִ֔ים הַֽלְוִיִּ֖ם וְהַנְּתִינִֽים:

3וּבִירֽוּשָׁלִַ֙ם֙ יָֽשְׁב֔וּ מִן־בְּנֵ֥י יְהוּדָ֖ה וּמִן־בְּנֵ֣י בִנְיָמִ֑ן וּמִן־בְּנֵ֥י אֶפְרַ֖יִם וּמְנַשֶּֽׁה:

4עוּתַ֨י בֶּן־עַמִּיה֚וּד בֶּן־עָמְרִי֙ בֶּן־אִמְרִ֣י בֶן־בָּנִ֔י מִן (כתיב בָּנִ֔ימִן־) בְּנֵי־פֶ֖רֶץ בֶּן־יְהוּדָֽה:

5וּמִן־הַשִּׁ֣ילוֹנִ֔י עֲשָׂיָ֥ה הַבְּכ֖וֹר וּבָנָֽיו:

6וּמִן־בְּנֵ֥י זֶ֖רַח יְעוּאֵ֑ל וַֽאֲחֵיהֶ֖ם שֵֽׁשׁ־מֵא֥וֹת וְתִשְׁעִֽים:

7וּמִן־בְּנֵ֖י בִּנְיָמִ֑ן סַלּוּא֙ בֶּן־מְשֻׁלָּ֔ם בֶּן־הֽוֹדַוְיָ֖ה בֶּן־הַסְּנֻאָֽה:

8וְיִבְנְיָה֙ בֶּן־יְרֹחָ֔ם וְאֵלָ֥ה בֶן־עֻזִּ֖י בֶּן־מִכְרִ֑י וּמְשֻׁלָּם֙ בֶּן־שְׁפַטְיָ֔ה בֶּן־רְעוּאֵ֖ל בֶּן־יִבְנִיָּֽה:

9וַֽאֲחֵיהֶם֙ לְת֣וֹלְדֹתָ֔ם תְּשַׁ֥ע מֵא֖וֹת וַֽחֲמִשִּׁ֣ים וְשִׁשָּׁ֑ה כָּל־אֵ֣לֶּה אֲנָשִׁ֔ים רָאשֵׁ֥י אָב֖וֹת לְבֵ֥ית אֲבֹֽתֵיהֶֽם:

10וּמִן־הַכֹּֽהֲנִ֑ים יְדַֽעְיָ֥ה וִיהֽוֹיָרִ֖יב וְיָכִֽין:

11וַֽעֲזַרְיָ֨ה בֶן־חִלְקִיָּ֜ה בֶּן־מְשֻׁלָּ֣ם בֶּן־צָד֗וֹק בֶּן־מְרָיוֹת֙ בֶּן־אֲחִיט֔וּב נְגִ֖יד בֵּ֥ית הָֽאֱלֹהִֽים:

12וַֽעֲדָיָה֙ בֶּן־יְרֹחָ֔ם בֶּן־פַּשְׁח֖וּר בֶּן־מַלְכִּיָּ֑ה וּמַעְשַׂ֨י בֶּן־עֲדִיאֵ֧ל בֶּן־יַחְזֵ֛רָה בֶּן־מְשֻׁלָּ֥ם בֶּן־מְשִׁלֵּמִ֖ית בֶּן־אִמֵּֽר:

13וַֽאֲחֵיהֶ֗ם רָאשִׁים֙ לְבֵ֣ית אֲבוֹתָ֔ם אֶ֕לֶף וּשְׁבַ֥ע מֵא֖וֹת וְשִׁשִּׁ֑ים גִּבּ֣וֹרֵי חַ֔יִל מְלֶ֖אכֶת עֲבוֹדַ֥ת בֵּֽית־הָֽאֱלֹהִֽים:

14וּמִן־הַֽלְוִיִּ֑ם שְׁמַעְיָ֧ה בֶן־חַשּׁ֛וּב בֶּן־עַזְרִיקָ֥ם בֶּן־חֲשַׁבְיָ֖ה מִן־בְּנֵ֥י מְרָרִֽי:

15וּבַקְבַּקַּ֥ר חֶ֖רֶשׁ וְגָלָ֑ל וּמַתַּנְיָה֙ בֶּן־מִיכָ֔א בֶּן־זִכְרִ֖י בֶּן־אָסָֽף:

16וְעֹֽבַדְיָה֙ בֶּן־שְׁמַעְיָ֔ה בֶּן־גָּלָ֖ל בֶּן־יְדוּת֑וּן וּבֶֽרֶכְיָ֚ה בֶן־אָסָא֙ בֶּן־אֶלְקָנָ֔ה הַיּוֹשֵׁ֖ב בְּחַצְרֵ֥י נְטֽוֹפָתִֽי:

17וְהַשּֽׁוֹעֲרִים֙ שַׁלּ֣וּם וְעַקּ֔וּב וְטַלְמ֖וֹן וַֽאֲחִימָ֑ן וַֽאֲחִיהֶ֥ם שַׁלּ֖וּם הָרֹֽאשׁ:

18וְֽעַד־הֵ֔נָּה בְּשַׁ֥עַר הַמֶּ֖לֶךְ מִזְרָ֑חָה הֵמָּה הַשֹּׁ֣עֲרִ֔ים לְמַֽחֲנ֖וֹת בְּנֵ֥י לֵוִֽי:

ועד הנה בשער המלך מזרחה. פתרון עד מהלאה עד שער ששמו שער המלך המזרחה:

המה השוערים. שלום ואחיו ממחנות בני לוי:

19וְשַׁלּ֣וּם בֶּן־ק֠וֹרֵא בֶּן־אֶבְיָסָ֨ף בֶּן־קֹ֜רַח וְאֶחָ֧יו לְבֵֽית־אָבִ֣יו הַקָּרְחִ֗ים עַל מְלֶ֣אכֶת הָֽעֲבוֹדָ֔ה שֹֽׁמְרֵ֥י הַסִּפִּ֖ים לָאֹ֑הֶל וַֽאֲבֹֽתֵיהֶם֙ עַל־מַֽחֲנֵ֣ה יְהֹוָ֔ה שֹֽׁמְרֵ֖י הַמָּבֽוֹא:

שומרי הספים לאהל. שלום בן קורא ואחיו לבית אביו הקרחים שומרי הספים של אוהל מועד שלא היו מניחים שום אדם לבא אל אהל מועד כי אם הכהנים בעבודתן:

20וּפִֽינְחָ֣ס בֶּן־אֶלְעָזָ֗ר נָגִ֨יד הָיָ֧ה עֲלֵיהֶ֛ם לְפָנִ֖ים יְהֹוָ֥ה| עִמּֽוֹ:

ופינחס בן אלעזר נגיד היה עליהם לפנים ה' עמו. שנתנבא לפנים ורבותינו אמרו הוא פנחס הכהן ועל שלא התיר ליפתח נדרו נסתלקה השכינה ממנו:

21זְכַרְיָה֙ בֶּ֣ן מְשֶֽׁלֶמְיָ֔ה שֹׁעֵ֥ר פֶּ֖תַח לְאֹ֥הֶל מוֹעֵֽד:

22כֻּלָּ֚ם הַבְּרוּרִים֙ לְשֹֽׁעֲרִ֣ים בַּסִּפִּ֔ים מָאתַ֖יִם וּשְׁנֵ֣ים עָשָׂ֑ר הֵ֚מָּה בְחַצְרֵיהֶם֙ הִתְיַחְשָׂ֔ם הֵ֣מָּה יִסַּ֥ד דָּוִ֛יד וּשְׁמוּאֵ֥ל הָֽרֹאֶ֖ה בֶּֽאֱמֽוּנָתָֽם:

המה יסד דוד ושמואל הרואה באמונתם. בקיומם:

23וְהֵ֨ם וּבְנֵיהֶ֜ם עַל־הַשְּׁעָרִ֧ים לְבֵֽית־יְהֹוָ֛ה לְבֵ֥ית־הָאֹ֖הֶל לְמִשְׁמָרֽוֹת:

24לְאַרְבַּ֣ע רוּח֔וֹת יִֽהְי֖וּ הַשֹּֽׁעֲרִ֑ים מִזְרָ֥ח יָ֖מָּה צָפ֥וֹנָה וָנֶֽגְבָּה:

25וַֽאֲחֵיהֶ֨ם בְּחַצְרֵיהֶ֜ם לָב֨וֹא לְשִׁבְעַ֧ת הַיָּמִ֛ים מֵעֵ֥ת אֶל־עֵ֖ת עִם־אֵֽלֶּה:

לשבעת הימים. לסוף ז' הימים:

מעת אל עת. משבעה לשבעה כל משמרת בשבתם:

26כִּ֣י בֶֽאֱמוּנָ֞ה הֵ֗מָּה אַרְבַּ֙עַת֙ גִּבֹּרֵ֣י הַשֹּֽׁעֲרִ֔ים הֵ֖ם הַֽלְוִיִּ֑ם וְהָיוּ֙ עַל־הַלְּשָׁכ֔וֹת וְעַ֥ל הָאֹֽצְר֖וֹת בֵּ֥ית הָֽאֱלֹהִֽים:

27וּסְבִיב֥וֹת בֵּֽית־הָֽאֱלֹהִ֖ים יָלִ֑ינוּ כִּֽי־עֲלֵיהֶ֣ם מִשְׁמֶ֔רֶת וְהֵ֥ם עַל־הַמַּפְתֵּ֖חַ וְלַבֹּ֥קֶר לַבֹּֽקֶר:

והם על המפתח. על מפתח העזרה:

ולבקר לבקר. לפתוח:

28וּמֵהֶ֖ם עַל־כְּלֵ֣י הָֽעֲבוֹדָ֑ה ֚כִּי בְּמִסְפָּ֣ר יְבִיא֔וּם וּבְמִסְפָּ֖ר יֽוֹצִיאֽוּם:

ומהם על כלי. כלי שרת במספר יוציאום ובמספר יביאום:

29וּמֵהֶ֗ם מְמֻנִּים֙ עַל־הַכֵּלִ֔ים וְעַ֖ל כָּל־כְּלֵ֣י הַקֹּ֑דֶשׁ וְעַל־הַסֹּ֙לֶת֙ וְהַיַּ֣יִן וְהַשֶּׁ֔מֶן וְהַלְּבוֹנָ֖ה וְהַבְּשָׂמִֽים:

30וּמִן־בְּנֵי֙ הַכֹּ֣הֲנִ֔ים רֹֽקְחֵ֥י הַמִּרְקַ֖חַת לַבְּשָׂמִֽים:

31וּמַתִּתְיָה֙ מִן־הַלְוִיִּ֔ם ה֥וּא הַבְּכ֖וֹר לְשַׁלֻּ֣ם הַקָּרְחִ֑י בֶּֽאֱמוּנָ֕ה עַ֖ל מַֽעֲשֵׂ֥ה הַֽחֲבִתִּֽים:

32וּמִן־בְּנֵ֧י הַקֳּהָתִ֛י מִן־אֲחֵיהֶ֖ם עַל־לֶ֣חֶם הַמַּֽעֲרָ֑כֶת לְהָכִ֖ין שַׁבַּ֥ת שַׁבָּֽת:

33וְאֵ֣לֶּה הַ֠מְשֹֽׁרְרִים רָאשֵׁ֨י אָב֧וֹת לַֽלְוִיִּ֛ם בַּלְּשָׁכֹ֖ת פְּטוּרִ֑ים (כתיב פְּטיּרִ֑ים) כִּֽי־יוֹמָ֥ם וָלַ֛יְלָה עֲלֵיהֶ֖ם בַּמְּלָאכָֽה:

ואלה המשוררים וגו'. פטורים מכל דבר המלאכה כי אם לשיר שירה:

34אֵלֶּה֩ רָאשֵׁ֨י הָאָב֧וֹת לַֽלְוִיִּ֛ם לְתֹֽלְדוֹתָ֖ם רָאשִׁ֑ים אֵ֖לֶּה יָֽשְׁב֥וּ בִירֽוּשָׁלִָֽם:

35וּבְגִבְע֛וֹן יָֽשְׁב֥וּ אֲבִֽי־גִבְע֖וֹן יְעִיאֵ֑ל (כתיב יְעִואֵ֑ל) וְשֵׁ֥ם אִשְׁתּ֖וֹ מַֽעֲכָֽה:

36וּבְנ֥וֹ הַבְּכ֖וֹר עַבְדּ֑וֹן וְצ֣וּר וְקִ֔ישׁ וּבַ֥עַל וְנֵ֖ר וְנָדָֽב:

37וּגְד֣וֹר וְאַחְי֔וֹ וּזְכַרְיָ֖ה וּמִקְלֽוֹת:

38וּמִקְל֖וֹת הוֹלִ֣יד אֶת־שִׁמְאָ֑ם וְאַף־הֵ֗ם נֶ֧גֶד אֲחֵיהֶ֛ם יָֽשְׁב֥וּ בִירֽוּשָׁלִַ֖ם עִם־אֲחֵיהֶֽם:

39וְנֵר֙ הוֹלִ֣יד אֶת־קִ֔ישׁ וְקִ֖ישׁ הוֹלִ֣יד אֶת־שָׁא֑וּל וְשָׁא֗וּל הוֹלִ֚יד אֶת־יְהֽוֹנָתָן֙ וְאֶת־מַלְכִּי־שׁ֔וּעַ וְאֶת־אֲבִֽינָדָ֖ב וְאֶת־אֶשְׁבָּֽעַל:

אשבעל. הוא איש בושת ולכך כינהו בושת לפי שבעל לשון אדני הוא וכינהו בושת ל' גנאי:

40וּבֶן־יְהֽוֹנָתָ֖ן מְרִ֣יב בָּ֑עַל וּמְרִי־בַ֖עַל הוֹלִ֥יד אֶת־מִיכָֽה:

מריב בעל. זה מפיבושת א"ר יצחק בר שמואל מנרבונא משעה שעבדו ישראל את הבעל נקרא הבעל שם בושת דכתיב לקטר לבושת לקטר לבעל (ירמיהו י״א:י״ג) כי הבעל הוא בושת וגדעון נקרא ירובעל על שסירב לו בעל (שופטים ו') ונקרא ירובשת דכתיב על אבימלך מי הכה אבימלך בן ירובשת וגו' בס' שמואל (ב' י"א) ונקרא ירובשת וירובעל, כי בעל ובשת אחד הוא:

41וּבְנֵ֖י מִיכָ֑ה פִּיתֹ֥ן וָמֶ֖לֶךְ וְתַחְרֵֽעַ:

42וְאָחָז֙ הוֹלִ֣יד אֶת־יַעְרָ֔ה וְיַעְרָ֗ה הוֹלִ֛יד אֶת־עָלֶ֥מֶת וְאֶת־עַזְמָ֖וֶת וְאֶת־זִמְרִ֑י וְזִמְרִ֖י הוֹלִ֥יד אֶת־מוֹצָֽא:

43וּמוֹצָ֖א הוֹלִ֣יד אֶת־בִּנְעָ֑א וּרְפָיָ֥ה בְנ֛וֹ אֶלְעָשָׂ֥ה בְנ֖וֹ אָצֵ֥ל בְּנֽוֹ:

44וּלְאָצֵל֘ שִׁשָּׁ֣ה בָנִים֒ וְאֵ֣לֶּה שְׁמוֹתָ֗ם עַזְרִיקָ֥ם| בֹּ֙כְרוּ֙ וְיִשְׁמָעֵ֣אל וּשְׁעַרְיָ֔ה וְעֹֽבַדְיָ֖ה וְחָנָ֑ן אֵ֖לֶּה בְּנֵ֥י אָצֵֽל: