פרק קמו

1הַֽלְלוּיָ֡הּ הַלְלִ֥י נַפְשִׁ֗י אֶת־יְהֹוָֽה:
2אֲהַֽלְלָ֣ה יְהֹוָ֣ה בְּחַיָּ֑י אֲזַמְּרָ֖ה לֵֽאלֹהַ֣י בְּעוֹדִֽי:
אזמרה לאלהי בעודי: בעוד אני חי:
3אַל־תִּבְטְח֥וּ בִנְדִיבִ֑ים בְּבֶן־אָדָ֓ם | שֶׁ֚אֵ֖ין ל֥וֹ תְשׁוּעָֽה:
4תֵּצֵ֣א ר֖וּחוֹ יָשֻׁ֣ב לְאַדְמָת֑וֹ בַּיּ֥וֹם הַ֜ה֗וּא אָֽבְד֥וּ עֶשְׁתֹּנֹתָֽיו:
עשתונותיו: מחשבותיו:
5אַשְׁרֵ֗י שֶׁ֚אֵ֣ל יַֽעֲקֹ֣ב בְּעֶזְר֑וֹ שִׂבְר֖וֹ עַל־יְהֹוָ֣ה אֱלֹהָֽיו:
אשרי: מי שאל יעקב בעזרו, שהבטיחו הקדוש ברוך הוא הנה אנכי עמך ושמרתיך והשיבותיך (בראשית כ״ח:ט״ו) ולמה אשריו לפי שהוא עושה שמים וארץ ואת הים וכיון שהכל שלו יש בידו לשמרו בים וביבשה אבל מלך עו"ג אם שומרו ביבשה אינו יכול לשומרו בים:
6עֹשֶׂ֚ה | שָׁ֘מַ֚יִם וָאָ֗רֶץ אֶת־הַ֖יָּם וְאֶת־כָּל־אֲשֶׁר־בָּ֑ם הַשֹּׁמֵ֖ר אֱמֶ֣ת לְעוֹלָֽם:
השומר אמת לעולם: לסוף דורות רבים הוא מקיים ושומר אמיתת הבטחתו:
7עֹשֶׂ֚ה מִשְׁפָּ֨ט | לַֽעֲשׁוּקִ֗ים נֹתֵ֣ן לֶ֖חֶם לָֽרְעֵבִ֑ים יְ֜הֹוָ֗ה מַתִּ֥יר אֲסוּרִֽים:
8יְהֹוָ֚ה | פֹּ֘קֵ֚חַ עִוְרִ֗ים יְ֖הֹוָה זֹקֵ֣ף כְּפוּפִ֑ים יְ֜הֹוָ֗ה אֹהֵ֥ב צַדִּיקִֽים:
9יְהֹוָ֚ה | שֹׁ֘מֵ֚ר אֶת־גֵּרִ֗ים יָת֣וֹם וְאַלְמָנָ֣ה יְעוֹדֵ֑ד וְדֶ֖רֶךְ רְשָׁעִ֣ים יְעַוֵּֽת:
יעודד: לשון כח:
10יִמְלֹ֚ךְ יְהֹוָ֨ה | לְֽעוֹלָ֗ם אֱלֹהַ֣יִךְ צִיּוֹן לְדֹ֥ר וָ֜דֹ֗ר הַֽלְלוּיָֽהּ:
ימלך ה' לעולם: יקיים את מלכותו בשמירת בניו: