פרק קד

1בָּֽרְכִ֥י נַפְשִׁ֗י אֶת־יְהֹ֫וָ֥ה יְהֹוָ֣ה אֱ֖לֹהַי גָּדַ֣לְתָּ מְּאֹ֑ד ה֖וֹד וְהָדָ֣ר לָבָֽשְׁתָּ:
2עֹ֣טֶה אוֹר כַּשַּׂלְמָ֑ה נוֹטֶ֣ה שָׁ֜מַ֗יִם כַּיְרִיעָֽה:
עוטה אור.  ברקיע כשלמה:
3הַֽמְקָרֶ֥ה בַמַּ֗יִם עֲלִיּ֫וֹתָ֥יו הַשָּֽׂם־עָבִ֥ים רְכוּב֑וֹ הַֽ֜מְהַלֵּ֗ךְ עַל־כַּנְפֵי־רֽוּחַ:
4עֹשֶׂ֣ה מַלְאָכָ֣יו רוּח֑וֹת מְ֜שָֽׁרֲתָ֗יו אֵ֣שׁ לֹהֵֽט:
עושה מלאכיו רוחות.  עושה את הרוחות שלוחיו:
5יָ֣סַד אֶ֖רֶץ עַל־מְכוֹנֶ֑יהָ בַּל־תִּ֜מּ֗וֹט ע֘וֹלָ֥ם וָעֶֽד:
6תְּהוֹם כַּלְּב֣וּשׁ כִּסִּית֑וֹ עַל־הָ֜רִ֗ים יַ֖עַמְדוּ מָֽיִם:
תהום כלבוש כסיתו.  זה דוגמת האמור במקום אחר (איוב ל״ח:ט׳) בשומי ענן לבושו וגו':
תהום.  הוא הים:
על הרים יעמדו.  מי אוקיינוס גבוה מכל העולם עומד על ההרים, וכן הוא אומר (עמוס ה ט) הקורא למי הים וישפכם על פני הארץ אין שפיכה אלא מלמעלה למטה:
7מִן־גַּֽעֲרָתְךָ֥ יְנוּס֑וּן מִן־ק֥וֹל רַֽ֜עַמְךָ֗ יֵחָֽפֵזֽוּן:
מן גערתך ינוסון.  כשאמרת (בראשית א׳:ט׳) יקוו המים ומאותו הקול יחפזון ונקוו אל מקום אשר יסדת להם:
8יַֽעֲל֣וּ הָ֖רִים יֵֽרְד֣וּ בְקָע֑וֹת אֶל־מְ֜ק֗וֹם זֶ֚ה | יָסַ֬דְתָּ לָהֶֽם:
9גְּֽבוּל־שַׂ֖מְתָּ בַּל־יַֽעֲבֹר֑וּן בַּל־יְ֜שֻׁב֗וּן לְכַסּ֥וֹת הָאָֽרֶץ:
גבול שמת.  להם החול אשר סביב שפתו:
10הַֽמְשַׁלֵּ֣חַ מַעְיָנִים בַּנְּחָלִ֑ים בֵּ֥ין הָ֜רִ֗ים יְהַלֵּכֽוּן:
11יַשְׁקוּ כָּל־חַיְת֣וֹ שָׂדָ֑י יִשְׁבְּר֖וּ פְרָאִ֣ים צְמָאָֽם:
12עֲלֵיהֶם עֽוֹף־הַשָּׁמַ֣יִם יִשְׁכּ֑וֹן מִבֵּ֥ין עֳ֜פָאיִ֗ם יִתְּנוּ־קֽוֹל:
עליהם עוף השמים ישכון.  על המעינות:
מבין עפאים.  ענפי אילנות וכן (דניאל ד) עפיה שפיר:
13מַשְׁקֶ֣ה הָ֖רִים מֵֽעֲלִיּוֹתָ֑יו מִפְּרִ֥י מַֽ֜עֲשֶׂ֗יךָ תִּשְׂבַּ֥ע הָאָֽרֶץ:
14מַצְמִ֚יחַ חָצִ֨יר | לַבְּהֵמָ֗ה וְ֖עֵשֶׂב לַֽעֲבֹדַ֣ת הָאָדָ֑ם לְה֥וֹצִיא לֶ֜֗חֶם מִן־הָאָֽרֶץ:
15וְיַ֚יִן | יְשַׂמַּ֬ח לְבַב־אֱנ֗וֹשׁ לְהַצְהִ֣יל פָּנִ֣ים מִשָּׁ֑מֶן וְ֜לֶ֗חֶם לְבַב־אֱנ֥וֹשׁ יִסְעָֽד:
מצמיח חציר וגו' ויין אשר ישמח לבב.  אנוש גם אותו יוציא מן הארץ ושמן. להצהיל בו פנים:
ולחם.  אשר לב אנוש יסעד:
16יִשְׂבְּעוּ עֲצֵ֣י יְהֹוָ֑ה אַרְזֵ֥י לְ֜בָנ֗וֹן אֲשֶׁ֣ר נָטָֽע:
עצי ה'.  בגן עדן:
17אֲשֶׁר־שָׁ֖ם צִֽפֳּרִ֣ים יְקַנֵּ֑נוּ חֲ֜סִידָ֗ה בְּר֘וֹשִׁ֥ים בֵּיתָֽהּ:
צפרים יקננו.  ישראל ישכנו שם יקננו לשון קן צפור:
18הָרִ֣ים הַ֖גְּבֹהִים לַיְּעֵלִ֑ים סְ֜לָעִ֗ים מַחְסֶּ֥ה לַֽשְׁפַנִּֽים:
הרים הגבוהים.  ברא ליעלים:
מחסה.  כל לשון מחסה לשון צל ומחבא שאדם מתכסה שם מן הזרם ומן המט' אבר"י בלע"ז:
19עָשָׂ֣ה יָ֖רֵחַ לְמֽוֹעֲדִ֑ים שֶׁ֜֗מֶשׁ יָ֘דַ֥ע מְבוֹאֽוֹ:
למועדים.  למנות בו זמנים ורגלים:
שמש ידע מבואו.  אבל ירח לא ידע מבואו פעמים שבא בארוכה פעמים שבא בקצרה:
20תָּ֣שֶׁת חֹ֖שֶׁךְ וִ֣יהִי לָ֑יְלָה בּֽוֹ־תִ֜רְמֹ֗שׂ כָּל־חַיְתוֹ־יָֽעַר:
תשת חשך ויהי לילה.  בכל יום אתה מחשיך ומעריב את השמש והיה לילה ובו תרמוש כל חיתו יער:
21הַכְּפִירִים שֹֽׁאֲגִ֣ים לַטָּ֑רֶף וּלְבַקֵּ֖שׁ מֵאֵ֣ל אָכְלָֽם:
22תִּזְרַ֣ח הַ֖שֶּׁמֶשׁ יֵאָֽסֵפ֑וּן וְאֶל־מְעֽוֹנֹ֘תָ֥ם יִרְבָּצֽוּן:
תזרח השמש יאספון.  במסתרים ונחבאים שם מבני אדם ואז כל אדם יוצא לפעלו:
23יֵצֵ֣א אָדָ֣ם לְפָֽעֳל֑וֹ וְֽלַֽעֲבֹ֖דָת֣וֹ עֲדֵי־עָֽרֶב:
24מָֽה־רַבּ֬וּ מַֽעֲשֶׂ֨יךָ | יְהֹוָ֗ה כֻּ֖לָּם בְּחָכְמָ֣ה עָשִׂ֑יתָ מָֽלְאָ֥ה הָ֜אָ֗רֶץ קִנְיָנֶֽךָ:
קניניך.  מקנה קנין שלך כמו (בראשית י״ד:י״ט) קונה שמים וארץ הכל קנוי לך:
25זֶ֚ה | הַיָּ֥ם גָּדוֹל֘ וּרְחַ֪ב יָ֫דָ֥יִם שָׁ֣ם רֶ֖מֶשׂ וְאֵ֣ין מִסְפָּ֑ר חַיּ֥וֹת קְ֜טַנּ֗וֹת עִם־גְּדֹלֽוֹת:
ורחב ידים.  רחב מקום לריי"ש בלע"ז:
26שָׁם אֳנִיּ֣וֹת יְהַלֵּכ֑וּן לִ֜וְיָתָ֗ן זֶ֚ה | יָצַ֥רְתָּ לְשַֽׂחֶק־בּֽוֹ:
לשחק בו.  שלש שעות ביום כך אמרו רבותינו במסכת ע"א וכך מפורש בספר איוב התשחק בו כצפור:
27כֻּלָּם אֵלֶ֣יךָ יְשַׂבֵּר֑וּן לָתֵ֖ת אָכְלָ֣ם בְּעִתּֽוֹ:
28תִּתֵּ֣ן לָהֶם יִלְקֹט֑וּן תִּפְתַּ֥ח יָֽ֜דְךָ֗ יִשְׂבְּע֥וּן טֽוֹב:
29תַּסְתִּ֥יר פָּנֶיךָ֘ יִבָּֽהֵ֫ל֥וּן תֹּסֵ֣ף ר֖וּחָם יִגְוָע֑וּן וְאֶל־עֲפָ֘רָ֥ם יְשׁוּבֽוּן:
תוסף רוחם.  לשון כליון כמו (לעיל עג) ספו תמו:
30תְּשַׁלַּ֣ח ר֖וּֽחֲךָ יִבָּֽרֵא֑וּן וּ֜תְחַדֵּ֗שׁ פְּנֵ֣י אֲדָמָֽה:
תשלח רוחך.  בתחיית המתים:
31יְהִ֚י כְב֣וֹד יְהֹוָ֣ה לְעוֹלָ֑ם יִשְׂמַ֖ח יְהֹוָ֣ה בְּמַֽעֲשָֽׂיו:
32הַמַּבִּ֣יט לָ֖אָרֶץ וַתִּרְעָ֑ד יִגַּ֖ע בֶּהָרִ֣ים וְיֶֽעֱשָֽׁנוּ:
יגע בהרים ויעשנו.  כמו שמפורש בסיני (שמות י"ט) והר סיני עשן כולו:
33אָשִׁ֣ירָה לַֽיהֹוָ֣ה בְּחַיָּ֑י אֲזַמְּרָ֖ה לֵֽאלֹהַ֣י בְּעוֹדִֽי:
בעודי.  כמו בעודני חי (דברים ל"א):
34יֶֽעֱרַ֣ב עָלָ֣יו שִׂיחִ֑י אָֽ֜נֹכִ֗י אֶשְׂמַ֥ח בַּֽיהֹוָֽה:
35יִתַּ֚מּוּ חַטָּאִ֨ים | מִן־הָאָ֡רֶץ וּרְשָׁעִ֚ים | ע֬וֹד אֵינָ֗ם בָּֽרְכִ֣י נַ֖פְשִׁי אֶת־יְהֹוָ֗ה הַֽלְלוּיָֽהּ:
יתמו חטאים.  חוטאים: